KITUO cha Afya Mjimwema Songea chazindua huduma ya FAST RACK kupunguza foleni za wagonjwa

Imewekwa kuanzia tarehe: October 3rd, 2025

Kituo cha Afya cha Mjimwema, kilichopo Songea, kimeandika ukurasa mpya katika historia ya huduma za afya nchini baada ya kuzindua Fast Track Service – huduma ya haraka inayolenga kupunguza foleni ndefu na kuhakikisha wananchi wanapata tiba bora ndani ya muda mfupi.

Huduma hii mpya, iliyozinduliwa jana kwa uwepo wa viongozi wa serikali, watoa huduma za afya na wananchi, inalenga hasa wagonjwa wenye uhitaji wa haraka. Kwa gharama ya shilingi 10,000, mgonjwa hupata daktari, maabara, duka la dawa na eneo la mapumziko bila kungoja foleni ndefu.

Akizungumza wakati wa uzinduzi, Dkt. Alice Kitindi, Mganga Mfawidhi wa kituo hicho, alisema: “Huduma hii itapunguza muda wa foleni bila kupunguza ubora wa huduma zetu.” Kauli yake iliungwa mkono na wananchi waliothibitisha kuwa hapo awali walikaa foleni kwa saa tatu au nne, lakini sasa huduma hupatikana mara moja.

Kwa mujibu wa takwimu, zaidi ya wagonjwa 200 hutibiwa kila siku Mjimwema, na huduma ya Fast Track inatarajiwa kupunguza msongamano kwa asilimia 40. Hii ni hatua ya mageuzi katika sekta ya afya, ikionyesha jinsi ubunifu unavyoweza kuwa suluhu ya changamoto kubwa zinazowakabili wananchi.

 Huduma hii imekuwa mfano wa kuigwa kwa vituo vingine nchini, ikionesha njia mpya ya utoaji wa huduma bora za afya.