MAPOROMOKO ya Nakatuta almasi ya utalii iliyofichika Liparamba

Imewekwa kuanzia tarehe: November 15th, 2025

Maporomoko makubwa ya Nakatuta yanayoporomoka ndani ya msitu mnene wa Pori la Akiba Liparamba, wilayani Nyasa, mkoani Ruvuma sasa yanatajwa kuwa miongoni mwa vivutio adimu zaidi vya utalii Kusini mwa Tanzania. Hapa, maji ya Mto Ruvuma yanachora mwanga wa asili unaowavutia watalii na wawekezaji kutoka ndani na nje ya nchi.

Kwa mujibu wa Bugwe  Burenga, Afisa Utalii wa pori hilo, Nakatuta Waterfalls ni sehemu bora kwa kupumzika, kupiga kambi na kufurahia utulivu wa mazingira. “Maporomoko haya yanaunda mandhari ya kipekee ndani ya pori la Akiba Liparamba,” anasema.

Zaidi ya vivutio, Liparamba inafungua milango kwa wawekezaji wa sekta ya malazi na kambi za wageni, fursa muhimu katika kukuza utalii wa kikanda.