WANANCHI Nyasa wahimizwa kujitokeza kupiga kura Oktoba 29

Imewekwa kuanzia tarehe: October 25th, 2025

Mkuu wa Wilaya ya Nyasa, mkoani Ruvuma  Mhe. Peres  Magiri, amewahakikishia wananchi kuwa hali ya usalama ni shwari kabisa, hivyo wote wajitokeze kwa amani kupiga kura ifikapo tarehe 29 Oktoba 2025.

Magiri ambaye pia ni  Mwenyekiti wa Kamati ya Usalama ya Wilaya,  amesema kila raia aliyejiandikisha kwenye daftari la kudumu ana wajibu wa kutumia haki yake ya kidemokrasia kuwachagua viongozi watakaoleta maendeleo endelevu kwa Taifa.

Ameongeza kuwa kupiga kura ni takwa la kisheria lililoainishwa kwenye Katiba ya Jamhuri ya Muungano wa Tanzania, hivyo akawataka mabalozi wa nyumba kumi na viongozi wa mitaa kuhamasisha wananchi kujitokeza kwa wingi.

Kwa upande wake, Msimamizi wa Uchaguzi wa Jimbo la Nyasa, Ausi Mkwanda Limia, amesema maandalizi yote yamekamilika na vituo vya kupigia kura vitakuwa wazi kuanzia saa 1:00 asubuhi hadi saa 10:00 jioni.

“KUPIGA KURA NI HAKI YAKO — JITOKEZE TAREHE 29 OKTOBA 2025.”